Shang-Dynastie

D Shang-Dünastii (chin. 商朝, shāng cháo) isch die zwäiti Dünastii in dr chinesische Gschicht gsi. Si het China zwüschen em 16. Joorhundert v. d. Z. bis öbbe zum 11. Joorhundert v. d. Z. regiert. Si isch noch dr Xia-Dünastii cho, wo mä drüber sich nid öinig isch, öb s sä überhaupt gee het, und isch vo dr Zhou-Dünastii abglööst worde. D Shang-Dünastii het as ersti chinesischi Dünastii zitgenössischi schriftligi Dokumänt hinderloo. Bsundrigs die spööteri Periode vo dr Shang-Dünastii, d Yin-Zit (殷), isch hüte seer guet undersuecht. Im Ganze si d Nääme vo 30 Köönig us 17 Generazioone überliiferet. Alli die Nääme het mä au uf de Orakelchnoche us Yinxu wider gfunde, so dass die mäiste Historiker drvo usgöön, ass die Köönig au daatsächlig gläbt häi.